فالمرسى ديال الداخلة دوزو صفقة شراء ميزان جديد وهو فالحقيقة غير بونوكازيو ولا كل انهار خاسر…
الداخلة تيفي :
كايبان ليا ماعمرها تتگاد هاد لبلاد و احنا عايشين بحال الى فغابة مكاين لا مسؤولية لا محاسبة،بعض المرات كاتگول واش هاد خوتنا المسؤولين مغاربة ولا غير عدو من شي جهة أخرى،وا بنادم طامع فكلشي و باغي ياخد بوحدو كلشي،الادارة اللي مشيتي ليها تلقى فيها تخلويض وخا تكون عندها غير 20 درهم فالميزانية،المهم ضروري كل واحد ياخد درهم ديالو.
نفس القضية وقعات فالمرسى ديال الداخلة،كانو هادي عامين شراو واحد جوج ديال الميزانات كبار،اللي تيوزنو فيهم الشاحنات اللي مشارجيين الحوت،و هاد جوج ديال الميزانات خرجات ليهم ميزانية خاصة بزبابل ديال لفلوس،ناضو خوتنا اللي مسؤولين على العملية و شراوهم غير بونوكازيو و بالربع ديال الثمن،ايوا هادي ماشي الشوهة؟
زيد شوهة على شوهة ياسيدي مللي دازت مدة قصير على هاد الصفقة ولاو الميزانات كل نهار فيهم لونبان وكل مرة كاين ديفو و كل مرة الميزان مخدامش و هاد شي كايدير العرقلة لشاحنات نقل الأسماك و كيدير الروطار لناس اللي عندها السبعة وخاصها تدوز فالميزان.
الوزارة ديال الصيد البحري و الكاتبة العامة ديالها مدام دريوش كاين بزاف ديال الامور مافخبارهمش و ما جايبين خبار لخروقات المسؤولين على هذا القطاع بالجهة،حاضيين غير الدرويش اللي خدام ب جوج دريال أما الصفقات و الخروقات مكاين اللي يتحاسب مع ماليها.
على العموم غادي تكون لنا عودة طويلة و بالتفاصيل المملة و بالارقام على هاد القضية وهلى الناس المتورطين فيها،والهدف ديالنا ماشي نفضحو شي واحد و إنما يعرف الجميع بللي راه كلشي فخبارنا و يعرف خونا المسؤول بللي القالب اللي تايسحاب ليها طالع مع الشعب راه فاي وقت يقدر يطلع معاه و ما يلگى من اعتقو.
