علاش المسلمين ما إقاطعو زيارة السعودية لأداء مناسك العمرة و الحج احتجاجا على إعدام العلماء

الداخلة تيفي :

سؤال بريء و ما عندو أي خلفيات عقائدية،بلعكس أحنا كمسلمين لواحد فينا يتمنى فحياته عمرة ولا حجة لذالك المقام المقدس،اللي كيعتبر عندنا فيه الحق كاملين و ماشي فملكية اي شخص سواء كان سعودي او غير سعودي ،هو مكان للمسلمين كاملين،نفس الشئ بالنسبة للعلماء المسلمين،حتى هوما ملك لنا كاملين ولو اختلفنا مع بعضهم ولو اتفقنا كلشي ممكن نختالفو فيه الا أسمى حق للانسان فهاد الكومب و هو الحق فالحياة.

باش انوض نظام كيف ما كان نوعه و إقرر بين ليلة و ضحاها اعدام مجموعة من علمائنا بدون سابق إنذار هذا امر غير مقبول زيد عليها ايلى كان هاد النظام سبق ليه دارها مرات عديدة و ماشي غير بالعلماء و انما بمختلف شرائح المجتمع و على رأسهم المثقفين و العلماء سواء فالدين او فالعلوم الحقة.

راه السكوت علامة من علامات الرضى،و الهيلالة فمواقع التواصل الاجتماعي ما عمرها غادي تبدل شي حاجة فهاد الاستبداد اللي تايقودو محمد بن سلمان ضد اي إنسان قال كلمة حق و اللي هو كايعتابرو معارض،و كايزيد يكسيري فالافعال الشنيعة ديالو مللي تايشوف الكل ساكت و الاقتصاد مروج بفضل مداخيل العمرة و الحج اللي هوما هازين هاد الدولة بخمسين فالمية و الخمسين الثانية بفضل النفط،و شي حاجة أخرى ربي أجيب.

الله عز و جل قال من رأى منكم منكر فليغيره،ماشي يسكت عليه كيف ما سكت الجميع على الجريمة اللي ارتكبها هاد النظام مؤخرا بتركيا ضد الكاتب السعودي المنفي جمال خاشقجي،ناضت الهيلالة شهر ولا شهرين و لكن شنو الفائدة، انت ماشي للعمرة و لا الحج الغاية عندك تزور مقام خير البشر و تتقرب لربك.

و لكن ما تنساش بأن “الله في عون العبد ما دام العبد في عون أخيه”،و انت باغي تزور بلاد باغية تعدم “ورثة الأنبياء” و هم الذين قال فيهم خير البشر “(من سلك طريقاً يلتمس فيه علماً سهَّل اللهُ له طريقاً إلى الجنةِ، وإنَّ الملائكةَ لَتضعُ أجنحتَها لطالبِ العلمِ رضاً بما يصنعُ، وإنَّ العالمَ لَيستغفرُ له مَن في السماواتِ ومن في الأرضِ، حتى الحيتانُ في الماءِ، وفضلُ العالمِ على العابدِ كفضلِ القمرِ على سائرِ الكواكبِ، وإنَّ العلماءَ ورثةُ الأنبياءِ، إنَّ الأنبياءَ لم يُورِّثوا ديناراً ولا درهماً، إنمّا ورَّثوا العلمَ، فمن أخذه أخذ بحظٍّ وافرٍ)

انا كتبت فقط رأي بدون خلفيات و من الزاوية اللي انا شفتها تقدر تعطي الثمار ديالها و تضغط مزيان على هاد النظام لعلى و عسى يتراجع عن هاد القرار اللي مليار فاليمة ما عندو علاقة لا بالشريعة ولا بالقانون و انما كيحط من كرامتنا احنا كمسلمين خصوصا مللي اكون قرار الاعدام بغاو انفذوه “نهار العيد”،شنهو معنى ذلك؟

راه الساكت عن الحق شيطان أخرس،و نتمنى بأنكم ما تكونوش شياطين مساهمة في ازهاق ارواح ناس ما شفنا منهم لا احنا ولا غيرنا سوى الخير و التنوير و الحث على الاعتدال و ترك الكراهية و الفتن،و ايحي واحد هالك المسلمين بالحروب و قاتل ملايير الأبرياء و انفذ إعدام ضد علمائنا و احنا غاديين لعندو ناشطين و ضاحكين، راه العبث هذا.

و ما على الداخلة تيڤي الا البلاغ…