السلطة التشريعية فهاد لبلاد غير الله إشوف من حالها.. برلماني حصلوه تينقل فالسيزيام
الداخلة تيفي :
تشوف فهاد لبلاد حتى تشوف و فلخر ترمش و تقول اللهم لا تؤاخذنا بما فعله السفهاء منا،شوهة تعطيك لشوهة و لكن هاد المرة زايدة فلادوز شويا ، مللي اكون مول الزبلة نائب برلماني يا حسرة و ينتمي لحزب يدعي المرجعية الإسلامية.
بالنسبة لينا و لبزاف ديال الناس الحزب معندو اي ذنب فالواقعة،ولكن عندو ذنب كبير مللي يقبل يعطي الموافقة على انتماء شخص ليه و الترشح بشعاره فالإنتخابات و الترافع داخل قبة البرلمان بإسم فريقه،وهو لا يملك روح المسؤولية و التعفف من الامور اللي يمكن ليها تشوه الصورة ديال الحزب اللي الجميع تيشهد ليه بوجود كفائات داخله.
خونا البرلماني قبل ما ينتمي لحزب “البيجيدي” فالانتخابات البرلمانية الماضية كان فحزب “لبام” و قلبها اسلامي،اليوم جا ادوز امتحان ديال الاولى بكالوريا (السيزيام) فاعداكية العرفان بالعاصمة الادارية الرباط، و جايب معاه “قافلة” ديال التلفونات باش “ينقل” ساعة طاح فواحد خونا فالحراسة ما كيتعاتقش و هو إسمر ليه واحد الرابور مگمح.
كما ان هاد صاحبنا البرلماني “قشيبل” حتى هو من بين المصوتين على قانون محاربة الغش فقبة البرلمان اللي كان توافق عليه هاد العام، و لكن “لا يغير الله ما بقوم حتى يغير ما بأنفسهم” .
أشنو دابا غادي يتسنى هاد الشعب المسكين من السلطة التشريعية ديال بلادو الى كان اغلبية النواب اللي فيها غير الكارثة حدا خوه؟
