كيافش يقدر المواطن يصوت على حزب الحمامة وهو تخلى على مرشحه رئيس جهة گلميم؟
الداخلة تيفي :
خايبة حتى فلمعاودة،هادشي لي دار أخنوش و الحزب ديالو مع مرشحهم رئيس جهة گلميم عبد الرحيم بوعيدة فالحرب ديالو مع لوبيات الفساد اللي كاتقول بأنها معارضة المجلس، و حشومة تتخلى على شخص عطيتيه التزكية باش يترشح بلون الحزب ديالك و دعمتيه فالانتخابات و مللي تصوت ليه الساكنة و اولي هو الرئيس الشرعي للمجلس تتخلى عليه و تخليه انوض و اطيح وحيدا فحرب مع هادوك اللي رفضت الساكنة تعطيهم اصواتها و اللي الجميع كيعرف اشنو دارو لگلميم و ناسها للأسف مللي كانو شادين البلدية.
على الأقل لو كان حزب اخنوش حيد عليه السيد و تبرأ منو حزبيا،نقولو راه ما بقاش محسوب عليهم،و لكن السيد مزال يحسب على الحزب ديالكم و تلوحوه بحال الكلب الشارد على حافة الطريق كما قال بتعبيره فالفيديو الاخير ديالو،الناس تفائلت خيرا فهاد الحزب مللي تبدلات التشكيلة ديال المكتب السياسي ديالو و تفائلت خير مللي شافت شعار اغراس اغراس و العمل و المعقول،و لكن واش من المعقول انك تتخلى على الشرعية؟ و اش هاد اغراس اغراس المعنى الحقيقي ديالها هو توقف مع الظالم ضد المظلوم ولا تسكت عن الحق؟
كيفاش يمكن للمواطن المغربي يعطي فالانتخابات القادمة الصوت الانتخابي ديالو لشي مرشح ديال حزب التجمع الوطني للأحرار و هو تايشوف كيفاش خوا الحزب بمرشح عطاتو الساكنة الاصوات ديالها من أجل ومضة أمل فالمستقبل ديال ولادها و بناتها و مدينتها، كن على يقين اخي المواطن و اختي المواطنة بان اللي يغدرك مرة يقدر يغدرك مليار مرة،بلا ما تجي تعطيني تبريرات بان السياسة هي هادي،و الى كانت هي هادي لاش كيتزايد علينا حزب الأحرار و الناس ديالو بشعارات مغشوشة و علاش اهاجمو گع اللي خالفهم الراي وعلاش اهاجمو العدالة و التنمية بنفس التهم الموجهة لهم،على الاقل العدالة و التنمية عمرهم تخلاو على شي واحد ديالهم بالعكس تعرضو للغدر ملايين المرات من عند مرشحين ملهوطين على المصالح الخاصة و فجميع الجهات.
اللي وقع لعبد الرحيم بوعيدة وقع كتر منو لرئيس مجلس جهة الداخلة الخطاط ينجا و اللي مع حزب الإستقلال،ما خلاو ما دارو عليه و فالاخير حيدها زطاطة،ولكن ماشي بوحدو السيد وقف معاه الحزب و ناس الحزب شرقا و غربا،شمالا و جنوبا،ولكن بوعيدة مسكين كان يسحاب ليه اختار الحزب المناسب ساعة لقى راسو “تايخور فيه ميت”.
التجمع الوطني للأحرار فالانتخابات البرلمانية اللي دازت،كان عطى وعد ل”عبد الفتاح المكي” اللي هو دابا برلماني فاقليم اوسرد عن حزب الاتحاد الاشتراكي،كان عطاوه وعد بللي غادي اشد التزكية ديال الحزب ديالهم و يترشح بيها فالانتخابات،خلاوه حتى بقات يوماين على اخر اجل لوضع ملفات الترشح و خواو بيه و عطاوها لواحد الشخص اخر اللي ما حطش الملف ديالو گع،و لو كان ماشي الاتحاد الاشتراكي اللي عتقو فالدقائق الأخير كون السيد مسكين ضيع وقتو و جهدو فلخوا الخاوي،الاحرار فالتبرير ديالهم لهاد الفعلة گاليك اسيدي داك الشي درناه لان عندنا تحالفات مع أحزاب اخرى بالجهة و بغينا لبلاصة تبقى خاوية هادشي گالو صلاح الدين مزوار فندوة صحافية دارها من بعد الانتخابات البرلمانية،ايوا دخلت عليكم بالله دابا هادا منطق يقبلوا العقل؟.
على العموم،الى كان أخنوش و الحزب ديالو و من يسبح في لابيسين ديالهم يظنون بأنهم تخلاو غير على عبد الرحيم بوعيدة،راه بالعكس تخلاو غير على المواطنين و تعهداتهم و الوعود ديالهم،و تهلاو على الحق و على مصلحة سكان الجهة كاملين،لان بوعيدة ماشي اخنوش ولا غيرو اللي داروه رئيس للجهة ولكن المواطنين باصواتهم،لذالك فالخيانة هي خيانة المواطنين كافة
