المستثمرالهبزة ، جرا على 120 خدام فلفريگو ديالو و مندوبية الشغل گالت ليهم معندي ماندير لكم.
الداخلة تيفي :
خلاوها اللي گالو لبلاد غادية فالخسران أحمادي،و راه فعلا لبلاد خسرات و احسن تگول حنا فغابة ماشي فبلاد لان القوة و الحق عند غير اللي عندو الحبة و الضعيف والله لا عقل عليه شي قنطوح.
هاد الحالة اللي غادي نهضرو عليها اليوم فيها بزاف ديال الأطراف و اول طرف فيها هو المستثمر فمجال الصيد البحري “الهبزة” و راه فعلا “هبزة” اللي قدر اجري على 120 خدام و خدامة من لفريگو ديال الساقية الحمراء و بدون سابق انذار و بدون حتى الحق فالتعويضات اللي تيكفلها ليهم القانون.
غير بات ما اصبح و الطرف الثاني هو المندوبية ديال الشغل فالداخلة واحد الادارة اللي عمرها سجل ليها التاريخ شي موقف مشرف فحق الشغيلة ديال الحهة،بالعكس مندوبية ما كتحلش المشاكل غير كاتجيب المشاكل و كتجي من طرف الظالم على المظلوم للأسف.
هاد المندوبية دابا شهر و نص و هاد الناس حاطين الشكاية ديالهم و المستندات ديال حسب لكلام اللي قالو لداخلة تيڤي ولكن لا حياة لكن تنادي و لا حتى محاولة حوار وحدة مع هاد الناس اللي بقاو متشردين فالزنقة،هنا كنعرفو المستثمر الحقيقي اللي كيگوليك حنا فالداخلة عمدنا الشركات المواطنة و كايبان واحد اخر مللي كايكون رمضان ولكن الحقيقة مكاين غير الشركات اللي كلات حقوق الناس ببرودة و بدون اي محاسبة و لا هم يحزنون.
