عامل أوسرد ضاربها بنعسا،فالوقت اللي لمين بنعمر و عبد الفتاح المكي يعملون على حل مشكلة معتصم الگرگرات
الداخلة تيفي :
بعدما خلف الوعود اللي عطاها لمجموعة الشبان المعتصمين بمنطقة الگرگرات هادي 15 يوم حسب ما صرحت به اللجنة اللي كتمثلهم و اللي سدو الطريق أمام گع الشاحنات اللي غادية و اللي جاية عبر البوابة الحدودية و طالبو بحقهم فالشغل و العيش الكريم،و بعدما سد الباب أمام لجنة كتمثل المعتصمين و رفض أنه يگلس معاهم على طاولة الحوار اللي وعدهم بيها،هاهو اليوم والي الجهة “لمين بنعمر” و النائب البرلماني عن اقليم اوسرد عبد الفتاح المكي و كعادتهم دائما يفتحون ابواب مكاتبهم بحثا عن حلول للمعتصمين و انهاء المشكل.
عبد الفتاح المكي بعدما تلقى اتصال هاتفي من طرف المعتصمين اللي طلبوه يوقف معاهم فالمشكل ديالهم بعدما تخلى عليهم الجميع لا من المنتخبين لا من المسؤولين بالادارات العمومية و اللي قال لهم بأنه غادي ادير اللي فجهدو و ان شاء الله مايكون الا لخير،و بالفعل ربط الاتصال مع والي الجهة اللي حتى هو عبر بكل فرح على ترحيبه بالمقترح و استعداده لفتح باب مكتبه أمام الجميع.
خمسة اشخاص يمثلون المعتصمين تلاقاو هاد الصباح مع والي الجهة اللي اكد أحدهم لداخلة تيڤي بأنه استقبلهم استقبال محترم و استمع لمشاكلهم و مطالبهم و كان واضح و صريح معاهم وقال لهم انا مستعد نوقف معاكم و نحل مشاكلكم فحدود ما يتيحه لي القانون،لكن المشكل ديال العمل فالبوابة الحدودية هداك أمر ماشي من المهام ديالي و لكن گع الامور اللي تدخل ضمن المهام ديالي اعتبروها موجودة.
اللجنة خرجت من اللقاء بمجموعة من مقترحات الحلول اللي غادي تعرضهم على المعتصمين بمنطقة قندهار و غادي تجاوب السيد الوالي على أساسهم.
و السؤال كيبقى…واش سيدي عبد الرحمان مزال ما فاق؟
