علاش السلطات تمنع أولاد الداخلة من العمل بقواربهم المعيشية،بينما گاشطورات صحاح دايرين شرع أيديهم؟

الداخلة تيفي :

لعجب العوجاب هو اللي واقع فهاد الجهة ديال الداخلة،بنادم الطايح كثر من النايض بسبب البطالة و التهميش و الإقصاء و مللي يبغي إدبر على راسو و إصوڤي راسو و دارهم و أولادو اجيه واحد شبعان لعاقة و ضارب بوسط مريح و إدير ليه لعصى فالرويضة و اگوليه سير موت أنت گااع.

أولاد هاد لمدينة كيتعرضو لنوع من الحرب بدون سبب،مللي سمحو ليهم فلمدينة اللي ما فيها لا خدمة لا ردمة و حتى بلايص الخدمة ممنوع عليهم إخدمو فيهم،مشاو إدبرو على روسهم و إخدمو بدراعهم فبحرهم و خيراتهم و لكن شكون غادي إخليهم و ديما الذريعة و الحجة هو تطبيق القانون،أوكي…،القانون واش على كلشي ولا غير عليهم هوما؟

تطبيق القانون فهاد لبلاد ولا غير شماعة مللي يبغي شي رجل سلطة كيفما كان إقمعك و إمنعك من حقك إگوليك تطبيق القانون،أنت تجي تمنع ولد لبلاد من رزقو بطريقة حلال و مغامر براسو و مضيع وقتو و تخلي گاشطور خانز فلوس و عمارات و أراضي و بالكونطربوند إدير ما بغا و إزيد غنى على غنى.

 تقنين القطاع يا إما إكون على كلشي و إما ما إكونش،فمدن أخرى كاينا مرونة فالتعامل مع الحالات اللي كتقلب على رزقها اليومي مادامت ما كتخدم لا فمخدرات ولا تهريب،بعكس الداخلة مكاين غير أحلب إلى لقيتي ما تحلب،كولشي طامع فجوج ريالات ما  اصورهم بنادم غير بالعذاب و واحد مفطح و مخلص و مهني مع راسو طامع فيه.

بزاف ديال الگاشطورات و صحاب اللعاقة فأفتاسات عندهم فلايك غير قانونيات و خدامين و كأن البحر وارثينو و دايرين ما بغاو و لا حسيب ولا رقيب،تحي حتى لولاد هاد لمدينة و إولي القانون و مكاين غير القانون.

إذن القانون عليهم و ماشي على لوخرين للأسف الشديد.