بوليس الداخلة طاحو على جوج أشخاص من عصابة سرقة المحلات و المنازل اللي وقعات مؤخرا

بعدما توصلت المنطقة الإقليمية للأمن الوطني بالداخلة بمعلومة تفيد بأن هناك محلات تجارية تعرضات للسرقة فجر اليوم بالداخلة و يتعلق الأمر بمحل لبيع الدجاج فشارع المقاومة بجنب سوبير مارشي ديال “مود” و محلات أخرين بشارع إمليلي،كثفات الشرطة القضائية من الدوريات ديالها فعين المكان و بفضل ذالك قدرت أنها توصل لأول خيط من خيوط عصابة روعات المدينة مؤخرا.

رجال الأمن طاحو على جوج قاصرين لهم علاقة بهادشي لي واقع هاد الأيام فالداخلة من سرقة للمحلات التجارية بمختلف الأحياء السكنية و حتى المنازل اللي ماليهم ماكاينينش فلمدينة بسبب حالة الطوارئ الصحية حصلو فمدن أخرى.

مصدر مطلع قال للداخلة تيڤي بللي البحث متواصل مع هاد الجوج من أجل فك خيوط هاد العصابة و الوصول لباقي الأشخاص اللي معاهم فهاد العمليات،و اللي أستغلو أوقات محددة لتنفيذ عملياتهم و لكن بفضل حنكة رجال الأمن بجميع نقط تواجدهم بلمدينة قدرو إطيحو عليهم.