رئيس المجلس الجهوي يتجول فلمهيريز و المعطلات أسبوع و هوما مليوحات فالشارع،ما هذا يا هذا؟

يقال باللهجة الحسانية “طريق لخبز عوجة” و بالدارجة “فين ودنك،هاااهي”،أمثال كتجسد هادشي لي واقع اليوم فالداخلة،مللي رئيس المجلس الجهوي ديالها مشا لإقليم بيرگندوز كيتسارا و لمدينة فيها حوالي 80 شابة معطلة كايباتو فالشارع هادي أسبوع.

 

إقليم بيرگندوز بينو و بين الداخلة حوالي 300 كلم، و الشاطو ديال الماء اللي كاين فحي كسيكيسات و اللي هو مكان إعتصام تنسيقية التحدي للمعطلين بينو و بين مقر مجلس الجهة حوالي 3 كلم،واش هادا ماشي لعجب بعينيه و ودنيه و راسو و رجليه؟

 

دابا ما بقينا فاهمين والو فهاد لبلاد،واش المجلس اللي عندو 77 مليار فالعام كيتسنى الولاية تدير الحل للمعطلين ولا كيتسنى الجماعات الترابية إطيح عليها الوحي و تخرج حلول للناس اللي تابعين ليها،ولا كيتسنا الداخلة تيڤي تقلب على مليارات التشغيل الذاتي اللي هادي 3 سنين كنقلبو عليها و تفرقها على المعطلين بالطريقة اللي فرق المجلس المال العام على التعاونيات الفقيرة،أش هاد لعجب؟

 

واش مكانش الأولى بالسيد الرئيس اللي كيدعي القرب من المواطنين إزور هاد التنسيقية و يهضر معاها و يفهم و يسمع شنو المطالب ديالها،ولا هاد الموضوع لا يدخل ضمن إختصاصات المجلس بحال ديما؟

 

إوا الله يلطف بينا و بيهم فهاد الأرض السعيدة و لكن الأكيد هو أننا ولينا كنشوفو لعجب و المنكر و ما لگينا اللي إغير شي حاجة غير النابوبي و الكوستيمات و التصاور و تا حاجة مكاينة الله إحضر السلامة.


شاهد أيضا
تعليقات الزوار
Loading...