تقلبت لفلوكة و كلشي مات،تفاصيل قصة مؤلمة لعائلة بغات تحرݣ لإسبانيا ساعة ماتو كلهم
مؤلمة بزاف تفاصيل هاد القصة التي كتهضر على عائلة من سكان حي الوحدة أو ما يعرف عند الكثيرين بإسم “الوكالة” بجهة الداخلة وادي الذهب،و اللي كتكون من خمسة ديال الأفراد و هوما الأب و الأم و جوج بنات و دري.
هاد العائلة كانت عايشة ما بيها ما عليها حتا لواحد النهار و نتيجة للظروف القاسية اللي كان الأب ديالهم كايعيشها قررو إحرݣو من الداخلة لإسبانيا فقوارب الهجرة السرية و الأب كان القرار ديالو انه إغامر و يدي معاه حتا العائلة ديالو.
هاد الأب اللي كان كل مرة و فاش كيخدم و اللي حسب شهادات الجيران ديالو تزير بزاف فالأونة الأخيرة بسباب إجراءات وباء كورونا و قلة الخدمة و باع شي أملاك كانو عندو و بفلوسهم باش قرر يمشي لإسبانيا إدبر على راسو.
نهار الأربعاء الماضي للأسف الشديد و مع لوقيتا ديال لفجر للأسف الشديد جا خبر بللي كاينا شي فلوكة تقلبات ضواحي منطقة تاورطة و بللي ماتو فيها سي ناس،مصادر قالت بللي الأب و الأم ديال هاد العائلة لقاو الجثث ديالهم و قدرات السلطات بللي تتعرف عليهم و تم دفنهم قبل أيام.
ولكن وخا لقاو الجثث ديال الأب و الأم مزال ما لقاو حتا حاجة على جثث جوج بنيتات و حدة عندها حوالي 10 سنين و الأخرى حوالي 6 سنين و دري صغير عندو تقريبا عامين، فاجعة مؤلمة و بزاااف.
هاد الموضوع ديال الهجرة السرية من شواطئ الداخلة ماشي و كتزيد الكوارث ديالو و الزيار مرة تكون و مرة ما يكونش، و فالحقيقة هاد الفواجع اللي كتوقع غير كاتزيد تدخر الصورة ديال لبلاد فالداخل و الخارج و السبب الأول ديالها هو تقاعس الكثير من المسؤولين على القيام بالخدمة ديالو.
