حزب البكاء على الأطلال،ميزانيات السنوات الخمس الماضية بانت فالحملة الإنتخابية الحالية
الحزب اللي خمس سنين وهو شاد الشادة و الفادة فمجلس جهة الداخلة وادي الذهب و ݣالس على عرش الملايير اللي كان بإمكانها تغير من واقع ساكنة الجهة اليوم يبكي و إزاوݣ فشوارع الداخلة و يستعرض عضلاته على خصومه السياسيين بحال إلى داخل شي حرب المليشيات.
جمع الطيوطات و النيسانات و الكماين و السيارات و لماطر و زوقهم بصورة الزعيم اللي خمس سنين كايوزع فالصفقات على الوافدين و المقربين منه و الوح الفتات لأبناء الجهة و إقوليهم أنا هو اللي دوايتكم و قريت ولادكم و كون ما أنا كون الأكسجين تقطع عليكم بحال إلى أحنا فشي دولة ماشي المغرب ولا تحت حكم فوضوي اللي بغا إدير شي حاجة إديرها.
الأخ الزعيم نسى بأننا فدولة سميتها المملكة المغربية وخا حريصة بزاف على التمثيل الديمقراطي للساكنة راها حريصة أكثر على أوضاع مواطنيها و مواطناتها يعني بتاعربيت تاعرابت كاينة مشاريع ملكية لو كانت ما عندهاش داك الطابع و ديك الهيبة والله حتا تحون فلوسها اليوم كتشتت فزواق و الميكروفونات و اتصاور و الكاسكيطات ولا تكون دارت فشي حساب بنكي ديال شي صديق الرئيس ولا عضو فالمجلس و مشا يخسرها فلقصاير و الكازينو و العقارات في الداخل و الخارج.
اليوم خاص الساكنة تعرف بلي لفلوس ديال ميزانيات خمس سنين هي اللي كتشوفوها اليوم كتوزع فالخاوي و هي اللي باغي الحزب المعلوم يفرض بيها وجوده و إزين بيها الصورة ديالو أمام القاصي و الداني، غادي تݣول ليا آش کاتݣول راه دارو مسيرة فالحي إكس و دارو مقر فالحي إݣغيݣ، غادي نݣوليك ياك القيادة ديال الحزب المعلوم كتݣول بأنها عندها مكانة خاصة فقلوب ݣع الساكنة ديال الداخلة؟ ولاش هاد صداع الراس و عرقلة السير و خروطو،علاش ما اݣلسو فديورهم و نهار التصويت الساكنة تقول كلمتها؟ ما يقدروش لأنهم عارفين بللي بزاف ديال الهضرة اللي تايقولو غير هضرة فقط و الهضرة ما تشري خضرة و لو كانت كتشري خضرة كون عكاونا لفلوس فين مشات! فلوس خمس سنين شنو دارو بيها على أرض الواقع؟
البكاء على الاطلال و أستعطاف الساكنة و التمثيل المسرحي راه ما بقاش خدام و ما بقاش واكل مع ساكنة جهة الداخلة،علاش؟ الشباب راه واعي و كل شاب ولا شابة راه معاه عائلة و لا جوج و من نفسو غادي يطرح سؤال شنو الإضافة اللي دارها رئيس المجلس الجهوي ليا كشاب و لا لشباب الجهة، غادي يلقا راسو بحال لحمق، يلقا بزاف ديال الفيدوات و اتصاور اللي خسر عليهم رئيس مجلس جهة الداخلة السابق أكثر من 60 مليون عطاها لشركة جايا من لعيون مصيفطها حمدي ولد الرشيد.
60 مليون لشركة غير باش تزوق و تحلق على داكشي، هاد الستين مليون زعما متقدرش تغير من واقع عائلة ولا جوج ولا ثلاثة؟ مشات غير فسنبوسوري ديال المنشورات الفايسبوكية و الصفحات الوهمية و الحسابات الفايسبوكية المتخصصة فالهجوم على الخصوم؟ عرفتي علاش؟ لأن حزب الميزان الهم الأول و الأخير ديالو ماشي خدمة الداخلة وساكنة الداخلة، بلعكس الهم ديالو اليوم هو بقاء الصراعات السياسية فالداخلة و الهم ديالو هو بقاء واحد المجموعة من الناس فالحزب على كراسي المسؤولية تاكل بزاف وتلوح شويا للناس،هذا هو الهم الواحد و الاوحد.
نشوفو حزب العدالة و التنمية كحزب كان شريك حزب الإستقلال فتسيير المجلس الجهوي للداخلة على مدة خمس سنوات، كانت عندو النيابة الأولى و يقدر إكونو فيه ناس دارو لفلوس من ميزانيات المجلس ولكن كاينة مفارقة كبيرة بين الحزبين اليوم كنشوفوها فالحملات الإنتخابية، حزب العدالة والتنمية ما دارش مسيرات الطيوطات و ما خسرش الملايير على الزواق،بل إكتفى بطريقته العادية و المعتادة و مجابش شركة بستين مليون من لعيون باش دير ليه الإشهار و تلمع ليه الصورة ديالو،الحزب عرض البرنامج ديالو و أعطى الأولوية لشباب قاريين و واعيين و ݣال بأسم الله و اللي جابها الله خير و بركة عكس حزب نزار بركة.
عموما القضية تفرشات و اللي كيفهم راه غاظي يفهم و اللي ما يفهم الأيام غادي تثبت ليه بزاف ديال الحوايج بحال ما ثبتت ليه كلامنا ديال خمس سنين هاهو اليوم بان بالدليل القاطع و بان مللي حزب الإستقلال كلشي هاجرو بسبب المشاكل الداخلية و بسبب بزاف ديال الحݣرة و بزاف ديال التحكم.
