الداخلة مدينة الله كريم لا صحة لا تعليم،واش مكاين شي مسؤول بهاد لمدينة يوقف مهزلة قطاع الصحة؟
بالمنطق ديال اللي دوا يرعف كيسيرو المسؤولين على قطاع الصحة بالداخلة القطاع، و أي طبيب غادي يدوي على داكشي اللي واقع فسبيطار الحسن الثاني الجهوي ولا فشي مستوصف أخر غادي يلقى راسو معلق في مقصلة القرارات الارتجالية ديال هاد المسؤولين على القطاع و غادي يعدموه يا إما بشي قرار ديال المجلس التأديبي ولا گع الطرد و عندهم هانية و سير كب الماء على كرشك.
ما غاديش نهضرو بالعاطفة فهاد الموضوع ولا غادي نكونو مع طرف ضد طرف، لأننا أولا ماشي مسؤولين بالوزارة الوصية على القطاع ولا محاميين، غادي ندويو بالمنطق و الواقع و اللي كيقول بأن هاد القطاع الناس ديالو خاصهم اعرفو بلي هوما مرآة المجتمع و قلب الانسانية ديالو و ما مشاوش للطب غير باش اقدمو الممكن و الغير ممكن لأرواح الناس ماشي إحولو مرافق حيوية لحمام شد ليا نقطع ليك.
خاص المسؤولين سواء فالمندوبية ولا المديرية اعرفو بلي المنصب تكليف ماشي تشريف و بلي ما دارو والو فهاد التكليف ما عدى انهم شدو الطبيب و مرمزو الصورة ديالو وهادشي ماشي غير اليوم ولا العام اللي فات هادي سنوات و هاد المافيات خدامة كتهدم فصورة الطبيب و المواطن تهبط على باباه بالخدمات و المعاملة الحاطة من الكرامة.
راه ماشي الى دوا الطبيب بالواقع و فضح الحقيقة ديال داكشي اللي واقع و اللي ماعرفوش المواطن وخا اكون عندو غاية اخرى تنوض انت كمسؤول عند سلطة تقديرية و الحق في اتخاذ قرار و تنزل عليه بالعقوبات التأديبية و الطرد التعسفي، علاش ما تنوض تصحح الاخطاء ديالك و دير نهضة حقيقية بالملايين اللي عندك من المال العام و تقدم خدمات مزيانة و تخلي بلاصتك مثال يحتذى به؟ ولا خاصو اكون طبيب زوين و اگول العام زين و زاهية عواشر؟ هادشي اللي كيعجب المسؤولين اللي تيسيرو هاد القطاع بالداخلة و هادي هي الصورة اللي كتوصل الوزارة فلوراق على قطاع الصحة فالداخلة بلي راه العام زين وهو السبيطار كلشي هرب منو بسبب الفوضى و لخنز ولعفن.
واش هاد لمدينة ما فيهاش شي مسؤول بالشكل و المضمون يوقف لهاد الناس و اقول ليهم وقفو هاد لعب الدراري؟ مكاينش اللي يقدر اقول لوزير الصحة ها تصاور سبيطار ها اللي واقع فقطاع الصحة فالداخلة من سيبة و فوضى خلاو المواطن اقول اللهم الموت بكرامة ولا تتعالج فلوسخ و اعاملوك معاملة حاطة بالكرامة، وا شوف انت غير الطبيب اللي ولد نفس الضومين معاهم شنو دارو ليه خلي انت اللي مواطن كاتعيش الحزقة على مدار الحياة ديالك، راه عندهم غير الفكرة ديال خوك فالحرفة عدوك فقط.
راه من غير الممكن بتاتا المواطنين اكون عندهم اجماع على حب واحد الشخص غير في سبيل الله، غير عجبتهم الصورة ديالو، ماهو ولد بلادهم ما يعرفوه ما يعرفهم لاقاتهم الوقت فداك السبيطار لمحشر و عاملهم معاملة مزيانة، وهادشي كيبان من حجم التضامن مع الاطباء اللي تعداو عليهم و اللي وقفوهم و حالوهم على المجلس التأديبي و لا بتعاربيت تاعرابت حفرو ليهم الفخ تحت شعار المساطر القانونية،أيوا ملي كاين القانون اسيدي سيفطو لينا شي لجنة الله يرحم بيها الوالدين تفحص لينا غير ميزانيات داك السبيطار فاش كتمشي و تدقق و تحقق فكل كبيرة و صغيرة و نعرفو اشنو كايمشي للكوزينة و شنو كيمشي للنقل و شنو كيمشي للأجهزة و شنو كيمشي لشركات الامن الخاص و كيفاش كتدبر هاد لفلوس ديك الساعة نكونو منصفين و فعلا بغينا اكون القانون، اما هادشي سميتو لعب الدراري و الوزارة مسؤولة و السلطات المحلية فالداخلة و الاجهزة ديال الدولة حتى هوما عندهم مسؤولية فهادشي اللي واقع و مكاين اللي احرك ساكن.
