ها الإنتخابات،ها الشيوخ،ها الجهوية الموسعة و المتقدمة،ها الحكم الذاتي، ولكن الى بغينا ستيلو فالداخلة خاصنا توقيع من الرباط؟؟
گاع المشاكل الاجتماعية لي كتخبط فيهم مدينة الداخلة هادي سنوات السبب الرئيسي ديالهم هو هاد المشكل ديال الاحتقان فالجنوب والحل و القرار فالشمال.
الداخلة تبارك الله جهة على قدها، ولكن غير فلوراق لان النص فالادارات ديالها تابعين لجهات اخرى، ها لي تابع لاكادير ها لي تابع لعيونولكن هاد الجهات الاخرى ما فيها حتا حانوت، اه غير حانوت تابع لداخلة،بمعنى اخر احنا جهة ولكن غير بالهضرا.
كاع القرارات كتنزل علينا بحال الصاعقة الله احضر السلامة، و لغريب فهادشي كامل ان صحاب القرار كيساويو فقرارتهم بين المواطن ليساكن فداخلة مع لي ساكن فجهات اخرى ولكن غير فالقرارات ماشي فشي حاجة اخرى تقدر تزيد بالداخلة لقدام ولا تعطيها الدورالحقيقي ديالها كجهة.
مثلا، هاد الملف ديال القوارب المعيشية، مدينة على قدها فيها حوالي 15 ديال رؤساء المجالس و المئات ديال المستشارين و البرلمانيين والشيوخ و الاعيان ولكن كنتسناو كاتبة عامة ديال الوزارة ديال الصيد تفرق علينا رزقنا و خير بلادنا و بالمزاج ديالها هي، حيت ديك الهضراديال التقارير و الراحة لبيولوجية و الحفاظ على المخزون السمكي غير بلابلا لا اقل و لا اكثر.
انواع الجهويات جربناهم، ها الجهوية الموسعة ها المتقدمة ها الفايقة ها الناعسة، ولكن ماذا بعد؟ شنو تبدل و شنو تغير فمدينة ف2022 الى بغات غير ستيلو خاصها تصبر عامين ولا اكثر باش اجيها من الرباط، يعني حتا داك ستيلو تسالي من كاع الجهات فالمملكة عاد تجيالنوبة ديال الداخلة.
ما عندو معنى هاد مركزية القرار، كون غير كانت قرارات سيادية كتخص الدولة و مصالح و علاقات الدولة متافقين، ولكن قرارات بسيطة ويقدر يتحمل مسؤوليتها الوالي ولا العامل ولا رئيس جهة ولا غيرهم من المسؤولين و لي عارفين متطلبات الساكنة فمدينتهم خاصك تبقى طالعهابط من الطيارة غادي للرباط.
اشمن دور عند هاد الاسطول ديال المسؤولين و المنتخبين و الشيوخ و الاعيان الى كان كلشي جاي من الرباط واجد،نبقاو نديرو انتخاباتوحدة فالرباط و نخليو الداخلة غير لعقود الازدياد و الحالة المدنية و راه نيت داكشي ليكاين فالداخلة.
