كأس العالم و كورونا…أحداث فضحت الجشع و الاستغلال ديال التجار فالداخلة فزيادة الاسعار على الشعب

جوج ديال الاحداث بارزة مرت بهم البلاد كانو كافيين باش افضحو داك الغول الداخلي ديال عشق الهمزة لي عند بزاف ديال التجار فمدينة الداخلة و حبهم لاستغلال المواطن و العمل بمبدأ طحن امو.

 

الى رجعنا شويا لور ليام الحجر الصحي ديال وباء كورونا غادي نتفكرو ملي التجار عوض اساعدو المواطنين لي مافحالهومش و اطمنوهم بلي الخير موجود و بلي المواد الغذائية عطاها الله و الثمن هو ،هو ما زاد ما نقص، دارو العكس و بداو كيبيعو باش ما بغاو و ازيدو زيادات خيالية على المواطنين حتا تدخلات السلطات و بدات كتكنش ليهم فالعقوبات و الغرامات عاد جمعو ريوسهم.

 

ماشي “وطنية” هاديك لي كتكون مفروضة عليك بقوة القانون و لا تكون كتخاف مكتحشم، الوطنية هي تعاون باش ما قديت و باش ما سخاك الله للحفاظ على صورة هاد لبلاد و الامن فيها و تعاون خوك المواطن على الاقل تبيع ليه بالسعر القانوني و المعقول.

 

الماتشات ديال كاس العالم راه بحالهم بحال ماتشات البطولة و ماتشات الدوري الاسباني و الانجليزي و كاس امم افريقيا، بمعنى اخر راه نفس التلفزة و نفس الاشتراك و نفس الضو لي خدامة بيه التلفزة و نفس الكرشي و نفس المشروبات، الفرق لي كاين هو ان المنتخب المغربي مقاتل باش افرح الشعب المغربي و مالين لقهاوي فالداخلة خدامين على اكرهوه فالتشجيع و الحماس .

 

مالين لقهاوي فالداخلة زادو زيادات خيالية عوض اكونو حتا هوما معاونين فتشجيع المواطنين للمنتخب داروها همزة بلا حشمة بلا حيا و علقو اعلانات للزبناء بلي الثمن تزاد ديال المشروبات يعني ماتش المنتخب فيه الزيادة و ماتشات البراني بثمن عادي، حتا لهادي ما عرفناش كيفاش نفسروها.

 

هادشي راه بيّن لينا ان الحكومة الله يحسن عوانها زادت فحاجة ولا جوج بسبب مشاكل كيعيشها العالم بأسره و لكن التجار ديال الكيلو زادو فمية حاجة على المواطن حيت الكونت بونكيغ خاصو شي فليسات و مغاديش احشمو غير الى تدخلات السلطات و دارت حد لهاد المهزلة.

 

خاص بحال هاد الناس اعرفو بلي المواطن المغربي الى بغا شي حاجة يعطي عليها دم الجوف ديالو خلي عليك الى كانت المنتخب الوطني لي سنين وهوما كيتسناو هاد الفرحة وخا تبيع ليه القهوة بمليون غادي يشريها و يتفرج و اشجع ولاد بلادو، ولكن فالمقابل خاص السلطات تتحرك و خاصة المندوبية ديال الشغل و تشوف لينا هاد لقهاوي واش عندهم شي رخص؟ واش الخدامة ديالهم مسجلين فالضمان الاجتماعي؟ واش معلقين لوائح الاسعار؟ ديك الساعة غيبدا البكاء على الاطلال و استعطاف تضامن المواطنين لي كيهلوكهم ديال بالصح.


شاهد أيضا
تعليقات الزوار
Loading...