شكون المسؤول على ما يقع فشواطئ الداخلة ولات اشهر بؤرة لتهريب المخدرات و لحريگ،و السلطات ضاربة الطم
الداخلة تيفي :
قليل النهار اللي ادوز فالداخلة بلا ما تسمع بللي شي فلوكة ولا جوج عامرين ببنادم حرگو لأوروبا ولا تشدو هازين انواع المخدرات،لحشيش و الفانيد و غيرهم،مع هاد الشي كامل و القضية بالنسبة للسلطات هانية بالعكس غادية و كاتزاد القضية حتى ولات الدلخلة للأسف الشديد بؤرة ديال التهريب و لحريگ و العصابات الخطيرة.
هادشي ولا بزاف يوم امس قارب هاز اكثر من 50 شخص حسب المعطيات اللي كاينة دابا كل وتحد فيهم جاي من قنت من المغريب زيد عليهم الأفارقة،كان غادي يخرج من الشاطئ ديال تماية اللي كاين شمال مدينة الداخلة ولكن سوء الحظ رجع من الحلم ديالهم للوصول الى جنة اوروبا لكابوس رعب حقيقي.
احد الاشخاص اللي نجاو من هاد الواقعة تايعاود لداخلة تيڤي بان الحمولة الزائدة ديال بنادم اللي كان فلفلوكة و حتى ضعف الخبرة ديال الرايس ديالها و سوء الاحوال الجوية كانو هوما السبب الرئيسي باش تتقلب لفلوكة و توقع هاد الكارثة،قال بان لفلوكة كان فيها الافارقة جنوب الصحراء و لمغاربة و الاغلبية ديالهم غير الشباب و معاهم حتى النساء.
من بعد ما تقلبات لفلوكة و وصلات لخبار لجوندارم اللي جاو فلبلاصة لعين المكان و هزو حوالي 14 شخص من هدوك اللي نجاو و فنفس الوقت كانو خرجو 3 ديال الجثث جوج افارقة و مغربي و مزال المفقودين بالعرام و مزال البحث عليهم مستمر.
ها شي غادي ارجعنا لشحال هادي،غادي اذكرنا بالوجع ديال شواطئ طرفاية و لبلاية و نواحيهم و شحال ديال الشباب بسباب البطالة و التهميش و الحگرة اختارو الموت و المغامرة بحياتهم و اشحال منهم مشى لفردوس الله عز وجل و كانت الامنية ديالو يوصل لأوروبا.
القضية اليوم ولات خطيرة،خصوصا مللي اكونو شادينها عصابات خطيرة هي اللي كتصاوب لقوارب و هي اللي كتشارجي بنادم من الداخلة لبلاصة اللي غادي احرگو منها،هنا كاين السؤال،فين مشات المراقبة ديال الشواطئ؟ كيفاش هاد الناس تيخرجو من الداخلة و ما كاين اللي جاب خبار؟ واش فراسكم بللي هادشي خطير ا عباد الله؟
الداخلة تيڤي فالبحث ديالها حول هاد الشي ديال لحريگ حاولت بأنها تفكك الخيوط ديال هاد التظيمات و كيفاش الطريقة ديال العملية و منين كتبدا و تلاقات بناس عندهم بزاف ديال المعلومات حول الموضوع اللي كيبقى بالنسبة لينا كسلطة رابعة خطير و خطير جدا و خاصو الضرب بيد من حديد اگاع الناس اللي عندهم شي علاقة بيه ولا تايعاونو عليه،و كتواعدكم بالتقرير صوت و صورة على صفحاتها فالقريب العاجل
