أخنوش بغا إعاود للمغاربة التربية،و لمغاربة بغاو إعاودو لأخنوش المقاطعة…
الداخلة تيفي :
مع أخنوش ديما كاين الجديد على الساحة السياسية،بزاف ديال الخرجات الإعلامية و المهرجانات الخطابية داخل المغرب و خارجه كحملة إنتخابية سابقة لأوانها،كلها كتبين بالملموس بأن أخنوش ليس السياسي اللي يمكن ليه إحسن من ظروف عيش المغاربة ولا حتى يدفع بلبلاد نحو مستقبل أفضل فهاد الوقت الخايبة.
هاد الخرجات هي اللي كتعطي الصورة الحقيقية ديال رجل السياسة و كتبين درجة الصبر ديالو و الحكمة فالتعامل مع قضايا البلاد و موجات الأزمات اللي ممكن أنها تمر بها لا قدر لها،داكشي علاش فالبلدان الديمقراطية كايديرو مناظرات مباشرة بين المرشحين،لأن المرشح ماغاديش إولي مسؤول على أشخاص معدودين بل الملايين ديال المواطنين،الملايين ديال الأشكال و الأنواع و الأصناف و العقليات و الأفكار و الآراء و حتى الديانات و العقائد،و من المفروض عليه إكون متوازن فطرحه و تعامله مع الجميع و إلا غادي يخلق مشاكل جديدة على المشاكل اللي واقعة و يصدق إدير المثل اللي تايقول”جا إطببوا صدق عورو”.
أخنوش صدق طاح فنفس الفخ،و حول الخرجات ديالو و المهرجانات و المنتديات و لعجب ديال الحزب ديالو،حولوا من نعمة لنغمة،عوض ما يعطي أمل فمستقبل مشرق و يعطي حلول عقلانية للظواهر الإجتماعية اللي كاين فالوطن و لا عاطيها غير للركوب على الموجات الشعبوية و المشكل بأن الخطاب ديالوا و الرسالة ديالوا ديما كيوصلها بالمقلوب و بواحد الكرايزما متشنجة اللي كتذكر لمغاربة فماضي سنوات الجمر و الرصاص و عمي ادريس البصري واللي هو أحد التلاميذ ديال العصر ديالو،ولا تيخلع لمغاربة و باغيهم إتيقوا فيه.
مزيانة تدافع على مقدسات الوطن،على ملك البلاد،على مؤسسات البلاد،على أي حاجة تقدر تمس من إستقرار هاد الوطن،و لكن ما تنساش بللي الحالات اللي كتهضر عليهم حالات شاذة،يعني حالات محصورةوفشخص ولا جوج ولا گاع عشرة،فين إبانوا من وسط أزيد من ربعين مليون مغربي و مغربية،ربعين مليون كتحب ملكها و وطنها و مؤسسات بلادها رغم گاع المشاكل الإجتماعية اللي كتعيشها،عندها أمل كبير بأن المشكل الإجتماعي لابد واحد أنهار يتحل و إولي من الماضي،اللي ماغاديش يتحل هو إلى مسات من إستقرار الوطن.
السي أخنوش طاح فتناقض كتير كبير فالخطاب ديالو،و هاذي عادة ولفناها ليه،لان التواجد ديالو فالحكومة الحالية إلى قارناه بالخطابات ديالوا غادي نلقاو واحد التناقض مكاينش منو جوج فالعالم،هاد المرة طاح فتناقض،كيفاش أنت رئيس حزب سياسي مغربي عريق و وزير دولة،كتطالب و تشدد على إحترام مؤسسات الدولة و رموزها و مقدساتها،و تگول سمحوليا لمغاربة نگوليكم راه العدالة و مؤسساتها ماشي بوحدهم اللي خاصهم إديرو خدمتهم،حتا أنتوما اللي ما مربيش عاودو ليه التربية،يعني إولي عندنا قضاء الشارع،اللي شاف واحد مامربيش من وجهة النظر ديالو إدوز عليه و إلى شدوه لبوليس إگول ليهم “صيفطني أخنوش” ولا شنو معنيتها؟.
هاد الوطن السي عزيز و أنت من الشاهدين،مر من الكثير و الكثير من الأزمات ديال بصح،خليني من زوبعات روتيني اليومي و اليوتيوب و الفايسبوك،الازمات و التكالبات السياسية ضد وحدته و استقراره وبحنكة رجال و عقلانيتهم خرجو الوطن بلا ما إطلبو من لمغاربة المواجهة مع شي واحد،و بلا حرب أهليه،وبلا حرب شوارع،بالعكس خلاو لمغاربة ناعسين على جنب الراحة و حلوا المشاكل بالتي هي أحسن.
من بعد هاد التصريحات الاخنوشية،خرجو مجموعة من مناضلي الحزب ديالوا تايدافعوا على رئيسهم و تايقولوا بأن التصريحات ديالوا تم تأويلها،وخا هي واضحة وضوح الشمس و التعابير ديال الوجه ديالوا كتبين شنوا المقصود،و لكن المشكل الكبير بأن هاد الإخوان و الأخوات اللي كنا تانتسناو بركتهم دخلوا لجامع ببلغتهم،مقاطع فيديو و تدوينات و مقالات لهاد المناضلين التجمعيين كاتزيد تصب الزيت على النار،و عوض ما تحاول تعالج المشكل و تصلح ما أفسده الرئيس زادت ستة على ستين و خرجوا طول و عرض فلمغاربة و صل حتى للكلام النابي للأسف الشديد.
معظم الصفحات المغربية المعروفة و اللي عندها و زن و تأثير فالرأي العام الوطني بالمغرب لوحت بإعادة الدرس ديال المقاطعة للمنتوجات ديال السي أخنوش و هي نفس الصفحات اللي كانت دارت المقاطعة الماضية و بسبابها خسر أخنوش و بزاف ديال الشركات ملايير الدراهم بسبب أش؟ بسباب زلة لسان وزير گال لمغاربة “لمداويخ”،صدقوا دوخوه بالصح.
