فين مشات فلوس 103 مشروع بالداخلة مبادرة،بعد موافقة الولاية و مجلس الجهة عليها.
الداحلة تيفي :
گالك محدها كتقاقي و هي كاتزيد فالبيض،هذا هو تجسيد الحال اللي ولات كاتعيش فيه جهة الداخلة وادي الذهب،كل شخص عندو قانون و كل مسؤول على إدارة و لا مؤسسة إدير ما بغى و شكون إحاسبو؟،كل واحد كايجاهد فتأجيج الصراعات و الاحتقانات الإجتماعية فظرفية الدولة كتبحث فيها عن طرق لتخفيفها و علاج ما يمكن علاجه،و فالاخير واحد فاق فالصباح و گاليه راسو يضرب توجه دولة على گدها عرض الحائط عندو بحال يشرب كاس ديال الماء.
فهاد الوقت اللي كنحاربوا من يتهجمون على مقدسات الوطن و مؤسساته و الناس اللي تجاوزت الخطوط الحمراء،كيخرجوا لينا وحدين باغيين “إريبو” مشاريع ملكية على گدها،و المشكلة هو تمت الموافقة عليها شكلا و مضمونا لفائدة أبناء و بنات الجهة خلال إجتماع ديال القيادة الخاص ببرنامج التشغيل الذاتي يوم الخميس 12 دجنبر 2019 و برئاسة الكاتب العام بالولاية و ممثل عن المجلس الجهوي و رؤساء المصالح الخارجية،و تعرضات فإجتماعات وطنية و تم تسويقها للادارة المركزية بالعاصمة.
الداخلة مبادرة و بعدما كملات گاع الإجراءات القانونية ديالها مع حاملي المشاريع ل 103 ما عطات حتى درهم حتا لدابا،هاد الشباب دارو وقفة احتجاجية قدام المقر ديال الجمعية اللي هي شريك مع المجلس الجهوي و مشرفة على تمويل هاد المشاريع و توصلات بلفلوس من المجلس الجهوي فحسابها البنكي الخاص اللي وصل لحوالي مليار و نصف،ايوا فين مشات فلوس عباد الله؟.
عشرات الشكايات اللي توصلت بيهم الداخلة تيڤي من عند هاد الشباب، اللي وقعوا على وثائق فيها مبالغ مالية ديال المشاريع ديالهم،و زادت الجمعية نوع جديد ديال التماطل عبر إجبار هاد الشباب على التزامات مسجلة فالتسجيل و التمبر خلصوا عليها مبالغ مالية كبيرة و هوما مزال ماشدو حتى درهم
