واش تجار السمك بميناء الداخلة فوق القانون؟ كل نهار خرق و كل نهار فوضى بالسوق و السلطات ساكتا حتى توقع الكارثة؟
حصلت الداخلة تيڤي على مقطع ڤيديو لتجمهر كبير لتجار السمك داخل سوق بيع السمك بالجملة بميناء الجزيرة بجهة الداخلة وادي الذهب،گاليك أسيدي بللي كيستنكرو قرار ديال السلطات المحلية فبني نصر اللي منعات الأسماك القادمة من أسواق جهات الجنوب ما تدخلش فهاد الضرفية الحرجة.
من حق أي واحد يحتج و ما عمر شي واحد قال العكس لهاد التجار اللي كاينين فميناء الداخلة مللي كانت الأمور سمن على عسل و أحتجوا شحال من خطرة و لكن مللي توصل القضية لواحد الضرفية اللي كتعيشها لبلاد و اللي خاص الجميع يتعاون فيها و يعرف بللي أي خرق و أي تجمهر راه غادي يتسبب لينا فشي مصيبة احنامقادينش عليها أ عباد الله.
تجمهر كبير و فمكان مغلق و كل واحد لاصق على لاخور إخلينا نسولو هاد الناس واش عايشين معانا فهاد لبلاد و لا معلبالهومش اللي واقع فلبلاد؟ واش ما فرسكومش شنو وقع فمدينة المرسى؟ و بللي التهور ديال مستثمرين فقطاع الصيد البحري تسبب لينا فكارثة صحية مشاو الضحية ديالها عشرات العمال تصابو بعدوى كورونا،واش هاد الناس ما فيهم صبر،السنوات كلها و أنتوما خدامين بخير و على خير جا نهار واحد متقدروش تصبرو مع بلادكم،راه كلشي باغي الاقتصاد ما يوقفش و كلشي باغي الناس تخدم و الناعورة دور ولكن ماشي على ضهر أبرياء و ماشي على ضهر خدمة شهورا ديال السلطات المحلية بالجهة.
هادي سيمانة نفس التجار نوضو الريگاطا فهاد السوق و دخلوا مع تجار أخرين من أبناء الداخلة فصراع و كانت غادي توقع فوضى فالسوق و حسابات بين تجار و بحرية و قالو للبحرية ماطلعوش الحوت للسوق و إلى طلعتوه ما عمرنا نشرو من عندكم كيفاش زعما اللي ولا تاجر فشي ضومين إدير ما بغا،يفرض على الدولة ما بغا و يفرض على البحار ما بغا و معامن بغا و يمنع اللي بغا؟ و فالاخير اقولك أنا باغي إقتصاد الوطن يتحرك،إيوا باز وصافي.
اليوم المشكلة ما بقاتش فالتجار بحدهم،السلطات المحلية و الوصية على قطاع الصيد البحري بالجهة و اولهم المندوب ديال الصيد بالداخلة كيتحملوا المسؤولية ديال هادشي و المسؤولية ديال صمتهم على هاد الفوضى،راه الإحتجاج فهاد الضروف خاصوا اكون بشي طريقة كتحتارم الجميع،و التجار ديال السمك كانو يقدرو يكتبو رسالة احتجاج ولا اكلفوا واحد فيهم يمشي يهضر مع المسؤولين ولا شي إطار قانوني ديالهم راه فيه الكفاية إوصل الرسالة ديالهم،أما تجي و دير وقفة إحتجاجية و مكاين اللي يهضر معاك و واحد أخر يتمنع من الاحتجاج علاش جابوا البحارة من بؤر الوباء حيت خايف على صحة الساكنة فهادشي كيعني بللي النص حلال عليه و النص حرام عليه، ولا نخليو حتى اطيح الفاس فالراس عاد نوضو نبكيو و كل واحد اقول ماشي المسؤولية ديالي؟.
اليوم السلطات المحلية بالجهة كلها خاصها تتحمل المسؤولية قبل ما تولي الداخلة بؤرة كورونية و يتحملوا المسؤولية ديالهم فالحفاظ على نتيجة الخدمة و التفاني ديالهم هادي ربعة الشهور،ماشي إجي واحد فلحظة على جوج كيلو ديال الحوت ولا عشرة دراهم و يضرب كلشي فالزيرو،علاش كون هو بالسلامة؟
