المندوب ديال الصيد البحري فالداخلة ساكت و داير عين ميكة على الجرائم اللي توقع فحق الثروة البحرية…
گاليك لفقيه اللي كنا نتسناو بركتو دخل لجامع ببلغتو،و هي اللي كتوقع كل يوم فلبحر ديال الداخلة و المندوب اللي خاصو يتحرك و إدير الخدمة ديالو ضاربها بنعسة و سكتا من داكشي الرفيع نعام أس.
كل نهار مجزرة ضد نوع من أنواع السمك فلبحر ديال الداخلة و كل نهار جريمة كاملة الأركان ضد الثروة البحرية و الأبطال ديالها سفن كبيرة تدي الأخضر و تعطي للساكنة اليابس و هادشي كيخرج كل يوم بالصوت و الصورة و لكن السي المندوب داير ديك القضية ديال “لا عين رأت و لا أذن سمعت”.
سؤال شحال من واحد غادي إطرحو على راسو، واش وزارة السي عزيز أخنوش فخبارها هادشي؟ غادي نگوليك، فخبارها أسيدي و فخبار گع المسؤولين اللي تاينوبو عليها فالداخلة و تايمثلوها مللي تبغي تطبق القانون على شي مسكين و لا تغني العيطة ديال الإنجازات اللي ما منهاش،هادشي فراسها و فراس حتى الأخت “زكية الدريوش” اللي هي الكاتبة العامة ديال القطاع.
اليوم خرج ڤيديو جديد كيوثق واحد المجزرة الضحية ديالها “الكوربين”،الڤيديو اللي نشروه نشطاء فايسبوكيين كيظهر فيه أطنان ديال الكوربين مليوحا فلبحر،هي جريمة و جريمة ماشي ضد الكوربين بوحدو و إنما ضد الوطن و ثروته،جريمة بحالها بحال بزاف ديال الجرائم اللي كتستهدف هاد لبلاد و ما لقاتش اللي إوقف ماليها عن حدهم و إوقف ليهم السفن ديالهم بالقانون و للأسف الشديد هاد الجرائم ما يديروها غير ولاد لبلاد يا حصرة و يسكتو عليها مسؤولين لبلاد حتى هوما.
هادشي راه ولا بزاف على “خ..ى دري” أعزكم الله،هادشي ولا مميع بلا قياس و غادي تلقى هاديك الكوربين غدا فالمگازات و تدخل لمدينة على عينك أبن عدي و بربي لا ذاق منها شي مواطن گرام و لا تحاسب شي واحد عليها ولا على غيرها.
و خليها على الله و صافي،الثروة غاديا فالخسران و كلشي ضاربها بنعسة…
