أشنو أستفادت الداخلة من گاشطور خدام فلحريگ و المخدرات و التهريب و فلوسو يهربها لبلاد أخرى؟

هادشي اللي واقع دابا فأفتاسات بعد قرار وزارة الصيد البحري كان خاصو يوقع من شحال هادي حيت هاد لگنس ديال الگاشطورات مكيحشموش و ما كايراعو لا لبلاد ولا لعباد و حاطين صبعهم فكل كبيرة و صغيرة فهاد قطاع الصيد التقليدي طالعين واكلين هابطين واكلين بحال المنشار.

 

راه الدولة خاصها ملي تحركات هاد المرة فهاد الملف بحزم خاصها تكمل الأجر ديالها و ملي تسالي من التحقيق فهاد القوارب الغير قانونية ديال الگاشطورات تدوز فالمرحلة الثانية للحسابات البنكية و الممتلكات ديالهم و تطبق معاهم مبدأ من أين لك هذا؟، هاد القوم لقاو السيبة فهاد لبلاد و حشاو ريوسهم بين ولاد لبلاد اللي ما عندهم حتا استفادة فهاد القطاع و اللي مستافدين يعدون على رؤوس الأصابع و بهاد السيبة ولاو عندهم أسطول ديال القوارب ها لي خدام فلحريگ و التجارة فالبشر و ها لي خدام فلحشيش و ها لي خدام فتهريب الأسماك و أزايز فعز الراحة لبيولوجية.

 

هاد القوم اللي كيسميو ريوسهم بالگاشطورات ولاو قوم من الطغاة قوم من الجاهلين بالقانون و ما يأمنو غير بلفلوس و كلشي عندهم لفلوس، لقاو على من إضحكو فهاد لبلاد و دارو الثروة و هربوها لبلادات أخرى و دارو المشاريع لكبيرة بعيد على عيون السلطات كاتلقاه فالداخلة عندو بيكوب خارجة سنة ميلاد جورج بوش الأب و فلبلاد مكاين غير الڤيلا و الفيرما و لحديد أخر ما غنات أم كلثوم.

 

خاص الجميع يعرف بلي القرار الأخير ديال وزارة الصيد البحري ما جاش عبثا و لا استهداف لشي فئة على حساب فئة اخرى و التحركات ديال وزارة الداخلية ماشي من اجل الاحتكاك مع زيد او عمر،بلعكس القرار جا بعد تقارير دولية على لحريگ و التجارة فالبشر فيها سميات ديال عشرات من هاد القوم ديال الگاشطورات و هاد التقارير أكدت بلي فشهر واحد ديال الراحة لبيولوجية قبل من القرار وصلات ازيد من 300 فلوكة هازة الحراگة.

 

ما يمكنش الدولة تبقى كتشوف الصورة ديالها كتشوه فالخارج بسبب واحد المجموعة ما كتشبعش و كتاكل الاخضر و اليابس و ما دير ردة فعل و تضبط الايقاع ديال هاد المنكر و حتا الدولة عارفة بلي ناس الداخلة و شباب الداخلة ما مستافد والو من هاد القطاع و بسيف سنوات و هوما كيطالبو بحقهم فالإستفادة من رخص و مكاين والو.

 

على امتداد الحِراك ديال البحارة و ملاك القوارب المعيشية من ابناء الداخلة الگاشطورات بلعو ألسنتهم و ضربوها بسكتة و بقاو غير كيتفرجو حيت كرشهم فيها لعجينة و حيت دايرين الملايير فكل قنت من المغرب و بحال دارو راحة بيولوجية شهر بحال داروها مؤبدة هوما ضربو المال و ولاو مالكين احياء خاصة بيهم فالداخلة و كلشي داروه بطرافيك.

 

الوزارة ديال الصيد البحري اليوم خاصها تعيد النظر فهاد لعجب ديال رولات(الرخص)الصيد التقليدي و ماشي معقول واحد عندو خمسة ديال الرخص كايكل بيهم عشرين عام و اجيال ما عندها حتا نص رخصة هادا و ما مخلص ضرائب ما هاز ما حاط و خاص الوزارة تشوف الوضعية ديال ولاد لبلاد و تدمجهم فالقطاع بصفة قانونية و ما يبقاوش كل مرة كتتهمهم جهة معينة بلي ماشي قانونيين و أي زبلة داروها هاد القوم تمشي ليهم هوما التهم راه بلعكس تماما هاد الشباب منظم و حاس بخطورة المرحلة و عارف بلي الثروة ملك للجميع و عارفين بلي صورة الدولة فالخارج خاصها تكون زوينة.


شاهد أيضا
تعليقات الزوار
Loading...