فلوسْ اللبن تديهم زعطوطة…وكالة تواصل من خارج الجهة شادة لملايْن وكتوزع الفتات على ولادْ لبْلاد بطريقة مقززة
مرة أخرى، خرج الواقع كيبين الحقيقة وراء بعض التظاهرات والمنتديات اللي كتنظم فالداخلة باسم الإشعاع والتنمية للأقاليم الجنوبية. المنتديات اللي الهدف المعلن ديالها هو “تسليط الضوء على الجهة” و”تعزيز دورها”، كتظهر بالملموس حاجة أخرى: فلوس كثيرة كتشدها وكالات تواصل من خارج الجهة، وكتوزع الفتات على ولاد المنطقة بطريقة مقززة.
الشي اللي كيبان واضح هو أن ناس المنطقة، اللي عندهم الكفاءة والمعرفة والمسؤولية، كيتهمشوا وما كيتعطاش ليهم الفرصة باش يديرو التواصل والإشعاع الإعلامي بشكل جدّي وفاعل. بينما الوكالات والصفحات من خارج الجهة كتدخل للداخلية وكأنها الوحيدة اللي قادرة على تدبير الأمور، وكأن أبناء الداخلّة مجرد متفرجين على فلوسهم كتطيح بين أيادٍ برانية.
هذي الوضعية كتخلينا نسوّل: واش الجهة غادية تبقى “بقرة حلوب” للبراني، وعلاش أبناءها ما كيتمشّوش يشدو دورهم فكل كبيرة وصغيرة بحال باقي الجهات؟.
الساكنة والمهتمون كيسوّلوا: حتى متى غادي يبقاو ولاد المنطقة مهمّشين وراضيين بالحكرة وبالفتات اللي كيجيهم من عند البراني؟ واش هذي هي الصورة اللي بغيناها لجهتنا؟
الواقع اليوم كيبين أن الوقت ولى باش أبناء الداخلة يوقفوا على رجليهم ويطالبوا بحقهم فالتواصل، في المنتديات، والفعاليات، وكل المشاريع اللي كتخص التنمية والإشعاع، بلا ما يبقاو مجرد مستهلكين للفتات والفلوس اللي كتسرب للبراني
