جا اوصلهم اطوصطوب،صدقو اختاطفوه و ربطوه فلخلى بنواحي العيون و داو الطوموبيل

الداخلة تيفي :

تايگول المثل المغربي مادير ما خير ما يطرا باس،و فعلا فهاد الزمان ما بقى ما يعجب، و ما بقى اللي يستاهل الخير ولا فمن دير الخير،الا من رحم ربي و ربك. السيد شيباني صحراوي من سكان مدينة العيون،عندو طوموبيل من نوع لاندروڤير تيكريها لناس لنقل البضائع خارج لمدينة،كان غادي اوصل شي سخرة لزبون ديالو فالبادية،فالطريق لگا شي دراري دايرين اطوصطوب بغا ادير فيهم الخير و اوصلهم فالطريق ديالو،ولكن هوما غير عصابة اجرامية.

شافوه شيباني و حگرو عليه،خداو ليه الطوموبيل و مشاو بيه لواحد لبلاصة،كتفووه و خلاوه مليوح لا ماكلة لا شراب، و داو الطوموبيل لمدينة و دخلوها عند واحد الطولوري. صبغو الطوموبيل بلون أخر و بدلو گع الديكور ديالها و النماري ديال الماتريكول ديالها،بغاو اطمسو گع العلامات اللي فيها و اخرجوها للبيع فالسوق،و لكن الفطنة ديال واحد الراجل اللي شاف الطوموبيل عند الطولوري فحي 25 مارس اللي جاي بعيد شويا على صونطر ڤيل ديال لمدينة خلاتو يعرف الطوموبيل و عاق بيهم.

مشا بلغ العائلة ديال الضحية و الناس اللي كانو تيقلبو عليه هادي أيام داخل المدينة وخارجها و عيطو للبوليس اللي جات لعند المحل ديال الطولوري و اعتاقلوه و بحثوه مزيان،الطولوري گر ليهم بسميات و العنوانين ديال الدراري اللي جابو ليه الطوموبيل و اللي حتى هوما اعتاقلهم المخزن فالحين.

هاد افراد العصابة اعتارفو بللي هاد الطوموبيل فعلا ديال الضحية و بللي هوما ربطوو ليه أيديه و رجليه و خلاوه فالبادية فواحد “لگرارة” مليوح،شي مصادر من عين المكان كاتقول بللي الدرك الملكي مزال تيقلبو على الضحية و بمساعدة افراد العائلة ديالو و المتعاطفين معه، ولكن البحث مزال مستمر و السيد مزال ما لقاوه و لكن غدا غادي ازيدو من عناصر البحث و اطوقو المكان لعلى وعسى اكون مزال على قيد الحياة .

من هاد الشي كامل و فهاد الشهر المبارك و لعزيز عند الله و المسلمين تنطرحو سؤال…واش أحنا مزالين هوما أحنا؟