أمن الداخلة ينجح في فك خيوط خلية تنشط في الإبتزاز و الضحية منتخب بجماعة بأوسرد
هادشي بزااف ولينا كل نهار فالداخلة كيخرج لينا لعجب المعحب،و لكن هاد المرة قصة من العيار الثقيل و مستوحاة من أفلام هوليود،نجح أمن الداخلة في فك خيوطها بسرعة البرق.
خلية تنشط في الإبتزاز بواسطة مقاطع الفيديو و الصور ديال الناس و اللي تصورو فوضعيات حميمية و الضحية اللي قاد الأمن لفك خيوط هاد الخلية هو منتخب معروف بإحدى الجماعات الترابية التابعة لإقليم أوسرد.
الضحية صرح للداخلة تيڤي بأنه يتعرض للإبتزاز هو و الزوجة ديالو منذ مدة من طرف مجهول على منصة الواتساب و اللي عندو فيديوهات بين الضحية و الزوجة ديالو فبيت النعاس و هددهم بنشر الفيديوهات فمواقع التواصل الإجتماعي إلى ما عطاوه عشرة ديال المليون.
الضحية ربط الإتصال ديالو بالنيابة العامة اللي عطات الأوامر ديالها لرجال الأمن من أجل التنسيق مع الضحية و دارو فخ لأول متهم فالخلية و اللي جا لمنزل الضحية من أجل إستلام المبلغ المتفق عليه و تسليم التلفون اللي كاينين فيه الفيديوهات و اللي شدوه البوليس فلبلاصة.
بعدما شدو البوليس أول متهم بداو فالبحث على الكتهم الرئيسي فالخلية و اللي كان كيتواصل مع الضحية و الزوجة ديالو و إهددهم كل نهار و بعد فخ قدرو إشدوه حتا و اللي كشف على بزافيال الخبايا الخطيرة.
التحقيقات الأولية و حسب مصادر الداخلة تيڤي قدرات توصل لأسماء شخصين من الخلية و هوما دابا فحالة فرار و حتا التحقيقات مزال مستمرة و من المتوقع تكشف على بزاف ديال الأمور اللي تكون خطيرة بزاف.
مصدر آخر صرح للداخلة تيڤي بلي هاد الخلية يقدر يكون عندها شي هاكر مختص فإختراق الهواتف و سرقة المحتويات اللي فيها من أجل الإبتزاز و تقظر تكون كتستهدف غير الشخصيات الوزنة بالجهة بحال المنتخبين و المسؤولين اللي غادي يعطيوهم داكشي لي بغاو و ربما إكونو كاينين بزاف ديال الضحايا ولكن غير مكمدينها و ساكتين.
